Ki sunda kudu binangkit

Assalaamu'alaikum wr.wb....

Sampurasun....!
Langkung tipayun simkurang seja nyanggakeun salam pangwanoh ka sakumna Ki Sunda, neda dihapunten bilih pedaran simkuring dihandap ieu kirang merenah, utamina dina ngalarapkeun basana. Rumaos Sunda teh saukur turunan, can mampu neuleuman eusi nu sayakti dina bagbagan Kasundaan nu sagemblengna......
Lamun ngabandungan sajarah & "sassakalana" Sunda teh mibanda pamor & kalineuwihan dibanding bangsa2 lain di Nusantara.... tapi naha atuh geuning beuki dieu teh asa beuki kasered kunu lian... boh dina urusan budaya, ekonomi, sok komo di widang pulitik.... Urang Sunda teu tembong punjul kalayan nyambuangkeun wawangi keur sakumna seuweu-siwi... (hampura lamun pamanggih simkuring rada "emosional").
Supaya "eksistensi" Ki Sunda pinunjul deui, sigana teu aya deui jalan iwal ti urang ngahijikeun deui rasa Kasundaan, dibarung ku rempug jukung sauyunan, sareundeuk saigel, sabobot sapihanean, dina ngokolakeun seuweu siwi tatar Pasundan....
Deudeuh teuing.... lamun Sunda tumpur, teu ajeg dina tetekon Kasundaan nu baheula diwasiatkeun/diwariskeun ti karuhun urang....
Sumangga urang lenyepan ieu Rumpaka:


"PANGAPUNGAN"
Sangkakala Padjadjaran
Watu gilang Padjadjaran
Watu gilang sang Niskala baheula
Baheula sabale gandrung,
sa Sunda sa Siliwangi
Gemah ripah kerta mukti....Raden
Naha atuh kiwari geuningan sagala gati.....deuh
Bongana pahiri-hiri,
Parebut dipayung tangtung
Pagirang-girang tampian,
Calik girang gede ajang
Naha alok henteu nyaho,
Somah nu lara balangsak
Geuning duh kaniaya
Nya urang papantunan,
kumelendang jeung kalangkang
Baheula sa Padjadjaran, sa Prabu, sa Balegandrung
Nu gandrung ka Sunda tandang....duh
Urang mindeng jejemplangan,
Ngajemplang jemplingkeun diri....Raden
Ulah rek kabareurangan
si Pelung ngalingkung lembur,
hudang urang rarancagan
Rancag batan kuda lumpat,
tarikna ku dedegungan
Kebat ka Bale Rancage,
hayu di ditu gebur gumebyar.
Reungeukeun tuh sangkakala,
Sangkakala Padjadjaran tangara
Mangsa mapag jaman anyar,
Mangsana ki Sunda Tandang
Rempug jukung sauyunan....duh
Tembongkeun ajen wewesen,
Satria nu Pinandita....Raden
Teuas peureup lemes usap,
Pageuh keupeul lega awur
Silih asah silih asih,
Bari adil paramarta
Sinatria pilih tanding,
Raden tedak Pasundan
====
Cag....!
Wassalaam...